فدائية الإسلام

[size=5]السلام عليكم ورحمة الله وبركاته
ايش رايكم بضحكم شوي من هذه الرساله0
توسع الصدر0
القصيمي بيفهمها0

رسالتس اللي كزيتي وصلتن وفرحت به ... وكثر الله خيركم على المقطع والغدفه اللي كزيتي لي,
وابشرتس ان اخبارنا تسرتس, البقرة اضنت , والبيض فقش, والدجاجة الرقطا راجن,
وان دحيم العلي أعرس, ونوير مخطوبة, وعويش فطمناه, وسويرة رفعناه من السقاط,
وصويلح شراله دنانة, وسليم ختم المصحف, وعزيز الصالح طاب من الطنان, وسند ولد
مضيوي بدا يحبي, والحمدالله طاب الجحام اللي بعينه, وانتي صاتزه حطينا عليه تبنه,
وحصيصه طابت اقطوفه اللي براسه, ومنيره مشطناه بوردة
وأم سويلم طلعت من الماجب, وتممنا لسويلم, والنعال الزنوبا اللي تخبرين عندنا هاك السنه
رقعناه, ومقطع الروز خبناه, والدوشق غيرنا قطاعته, والسفره الكبيرة علقناه بالقبة,
وحطينا بيت للرادو, والمصحف حق عمي غيرنا ثوبه, والسراج زينا فتيلته, والزبيل مليناه
حتا من نخلتنا, وشرينا سحارة ولقيناه مكسورة, وبقول اني مع هالحمولة غاديتن
حوسة, الطاية تخر, والمثعب منشق, والقتالة منقلعه, وباب الروشن منكسر, والتسوله
مسنيه, وبريتز الغرش الصغير منقشع, والله يهديتس يأم دحيم, البزار اللي كزيتيه شوس
الكركم به, والمسمنه تقل رماد مابه ليمون, والفتيت مسري, والكليجا تقل عظامة, وذا
بغيتوا تكزون شيء كزوا شي يبل الريق ويواجه عند الحمولة, معكم علم ان حمولتنا ناس
نقادة. وخالتي شراهة, وعمتنا حقنة مايجوز لها شي مثل رقاص الساعة, وحريم عمومتنا
صرت اثمنلهن, وجذعانهم فرقا عين جدي شيبان كبري يترددون على هالجصة قضوا على
النعمة تقل دبا, وانا ماودي أطول عليتس الحتسي عسا مايخليني منتس, ولامن جناين
قلبتس, لاخلا ولاعدم وسلميلي على نفستس ومن يعز عليتس. وأخص بالسلام مضيوي
وفطوم وقوليلهم والله ماخلان أقصر عنوتي عنكم وأشوفكم الا اني عويجزة ولاصقة علي
ظهيري وضليعاتي ومارخة كتوفي ورجيلاتي بالفقس.. ومعتس علم هالارياح يعودن بين
حين وحين ومع هالبراد صايلات علي يالله حسن الخاتمة والعمل الصالح (مير كود أندس)[/size]