تزاحم بالضمير هموم قلب حاير مكسور
ولا ينفع بقلب المنكسر كثرة جبايرها
تلاطم بالضلوع العوج موج عاتي وبحور
ولا من مركب وشراع يأمن ثأر ثايرها

أنا مالي بهالدنيا سوى قلب وقلم وشعور
صديق صادق ياقف ليا صكت معابرها
وليا ضاعوا بلياها حياة من نكد وعثور
فلا مطرودها ملحوق من كثرة عثايرها

أنا قلبي دليلي في زمان مدبر مسعور
كبير مايهمه لوتحاول به صغايرها
ألملم بالقلم أشتات وروحي في ورق وسطور
وأنثر كل معنى في ضمير اللي يناظرها

لي إحساس يصور مايحوم بداخلي ويثور
صدوق و أعذب الأشعار ماتصدق مشاعرها
صديقي صعب نختاره بعالم بالأنام يمور
حسود وجاهل وراعي مصالح مع مكابرها

ياكثر اللي تضاحك لي وقلبه بالمرض مغمور
على وجهه يبين اللي يخفي في سرايرها
صديقي مأمني ياقف معي بالخير ولا شرور
ولا يذيع الذي بيني وبينه بين غادرها

ولا ينسى ليالينا ولا هو جاحد ومغرور
مواقفنا القديمة دايم بالخير ذاكرها
ياليت الروح بحمول المصايب والعذاب تروح
دخيلك شيلها يا مال وين اللي يثورها

علينا من عنى الدنيا متاهات وشقا ودهور
ولو إن الجبال تشيلها ماظني تقدرها
إذا بظفرك طرفت العين لاتدور على دكتور
ترى ماتحرق النيران غير اللي يجاورها