snow_rose

محبة الصالحين

وعليكم السلام ورحمة الله وبركاته

عزيزتي .. snow rose

مقدمة مشوقتني وابي اعرف بالضبط اش هالسوالف ؟..

انتظرك حبيبتي وأسأل الله أن يجزيكِ وعالية همة النية الخالصة لوجهه الكريم .,

بحول الله لن يكون هذا الموضوع من الصفحات المنسية ,,,

بالانتظار

عالية همه

وعليكم السلام ورحمة الله وبركاته

هلا والله وغلا بالغاليه سنو روز حيالله من جانا

جزاج الله خير على قبول الدعوه وفتح هالموضوع بالذات في اسحار

اللي فعلا لاقى اعجاب الكثير في منتديات ثانيه فحبيت نحيه هالمره في اسحار عسى الله يقبله يارب في ميزان اعمالنا ......

الموضوع بعد اذن الغاليه سنو روز بشرح شرح مختصر لأداة العمل فيه وكيف بتسير ......

هو اننا نتناقش باي موضوع دعوي اجتماعي يتطرق لاي نقطة من حياتنا وما يواجهنا في الحياة العامه ونحاول ننقاشها بمنظور ديني لكن بأسلوب عامي بحت لان فيه كثير مايحبون يقرون مواضيع دعويه بلغة فصحى او مثلا مايعرفون يشاركون بمواضيع بلغة فصحى فهالموضوع بييسر لهم الدعوه لله والفائده بلغة عاميه وهالموضوع الفائدة الكبيره فيه هو انه توعيه شخصيه لنا احنا ماهو للنشر بالنت لا مجرد مناقشه بينا بجميع المجالات تفتح اي وحده اي موضوع ونتناقش فيه وننتقل لموضوع ثاني من اي نقطه نتطرق لها .......

اتمنى اني قدر ت اوصل المعلومه عدل

وكل الشكر للمولى عز وجل اللي يسر لنا هالمنتدى نلتقي فيه على الخير وننشر دعوة الله ونذكر بعض ونعين على الطاعه ........ وعسى الله يثبتنا على طاعته .......

ثلوج

محبة الصالحين

زادني توضيح الفكرة شوقاً للنقاش الذي سيحويه هذا الموضوع ..

حنا محتاجين لهالمواضيع البسيطة ..

طيب شنو تحبون نبدا فيه حبيباتي سنو روز وعالية همة ؟

رجاااااءً لا يركد الموضوع من جهتكم..

أحب المواضيع المتفاعله !!!

سنبلة الإيمان

الله يجزيكم الخير ياعالية همة ويا سنو روز ... شوقتونا للموضوع


بالتأكيد احنا معاكم ... ابدأن يرعاكم الله ونحن في الإنتظار

:00021: :00022:

صدى المحراب

صدى المحراب

snow_rose

بسم الله الرحمن الرحيم

ياهلا فيكم خواتي مره ثانيه
وقبل كل شي الصفحه هذي ماراح تخصني لحالي بالعكس الموضوع موضعكم و الصفحه لنا كلنا اتمنى انها تكون جزء منكم مثل ما اهيا جزء مني ان شاء الله

ومثل ما وعدناكم اننا بنتطرق بهالموضوع بشكل اكبر والحمدلله حضوركم هذا فعلا شجعنا اكثر وعقبال الباجيات يارب تدرون ليش !!!!


لاني حبيت ان هذي الصفحه تكون ملتقى المتحابين في الله
سبحان الله وما التقى شخصان متحابان في الله وذكروا الله الا خرجوا وهما مغفور لهما باذن الله

ذكركم هالكلام بشي !!!!!!!!
ما ذكركم بحلقات الذكر اللي هي روضه من رياض الجنه سبحان الله
والشخص اللي يحرص على تواجده فيها يغفر له ربي في الدنيا قبل الاخره ويحشره يوم القيامه مع السبع الفئات اللي ربي رحمهم من عذابه و تكرم عليهم بظلال من عرشه الكريم بعيد عن المغضوب عليهم من خلقه

وحلقه الذكر مو شرط تكونين داعيه مثل ما بعضنا متخيل او لازم تكونين عالمه ومتبحره بالدين لااااااا مو شرط
يكفي انج لو حتى تمسكين كتاب ديني وتقعدين مع أي شخص عزيز عليج وتقعدتون متربعين على الارض على شكل حلقه لانه من السنه.... وتكلمتوا بالموضوع

هذا الامر البسيط والله انها تترتب عليها امور عظيمه بعالم الغيب سبحان الله ((يعني اشلون))


يلله نتخيل الحين شراح يصير واحنا ملتمين بحلقه الذكر
ربي خلق ((الملائكه السياره)) وظيفتهم انهم بس يمشون بطريج طوييييييييل حول البيوت من غير عمل أي شي لكن بمجرد اننا ابتدينا وقلنا بسم الله والصلاه والسلام على رسول الله .....
ويسمعونا واحنا نذكر الله ... ينادون بعضهم البعض ... يلله يلله تعالوا في حلقه ذكر بالبيت الفلاني ويجلسون على كتف كل شخص جالس بالحلقه ( وتخيلوا حجم الملائكه بمقياس ان جبريل عليه السلام لمن امره انه يقلب مدينه بكاملها على عباده المغضوب عليهم قلبها بطرف من جناحه يعني حجمهم جبييييييير)
والشيطاين يسحبون روحهم ويوقفون عند عتبه الباب وينتظرونا ليما نخلص من هذي الحلقه ومن كثر الملائكه يتجمعون يتجمعون يتجمعووووووووون حوالينا على شكله حلقه ومن كثره يرتفعون الى السماء على شكل اسطوانه ليما يوصلون لله سبحانه (طبعا ربي عارف وشايف وعالم بكل شي يصير) ويسألهم الله عز وجل من اين جئتم يقولون له من عند فلان وفلان وفلان يسألهم فيما يسألوني يقولون له يسألون جنتك ويخشون عقابك فيقول لهم الله عز وجل قد غفرت لهم

وما يطلع شخص الا وهو مغفور لهم حتى اللي كان موجود وماله خلق لحلقه الذكر سبحان الله ربي حابه بانه يحضرها وكاتب له انه يكون موجود بهذي الحلقه عشان يحضرها ويغفر له ربي حتى واهوا مو مشتهي القعده يكفي حضوووره

واقتبس بعض من كلام غاليتنا عاليه الهمه -


(((((الذاكرين الله في حلق الذكر تجتمع الملائكة معهم وتجلس معهم وتحفهم وتذكرهم عند رب العالمين والحديث اللي بذكره وذكرة شرحه سنو روز يدل على صدق ماقلناه عن أبو هريرة رفعه : (( أن لله ملائكة يطوفون في الطرق يلتمسون أهل الذكر فإذا وجدوا قوما يذكرون الله تعالى تنادوا هلموا إلى حاجتكم فيحفونهم بأجنحتهم إلى السماء الدنيا فيسألهم ربهم وهو أهلم بهم : ما يقول عبادي ؟ قال : يقولون : يسبّحونك ويكبّرونك وبحمدونك يمجدونك . فيقول : هل رأوني ؟ فيقولون : لا والله ما رأوك . فيقول : فكيف لو رأوني ؟ لو رأوك كانوا أشد لك عبادة وأشد لك تحميدا وأكثر لك تسبيحا ، فيقول : فما يسألون ؟ فيقولون : يسألونك الجنة ، فيقول وهل رأوها ؟ فيقولون : لا والله يارب ما رأوها ، فيقول : كيف لو رأوها ؟ فيقولون : لو رأوها كانوا أشد عليها حرصا وأشد لها طلبا وأعظم فيها رغبة . قال فمم يتعوذون ؟ فيقولون : يتعوذون من النار .فيقول : وهل رأوها ؟ فيقولون لا والله ما رأوها ، فيقول : فكيف لو رأوها ؟ فيقولون : لو رأوها كانوا أشد منها فرارا و أشد لها مخافة ، فيقول : أشهدكم أني قد غفرت لهم ، قال : يقول ملك من الملائكة : فيهم فلان ليس منهم أنما جاء لحاجة ، قال : هم الجلساء لا يشقى جليسهم)) للشيخين ..... )))))))



ومع كثر حضورنا للحلقات تخيلوا يكون لنا شرف بالسماء ونكون معروفين عند الملائكه هذي فلانه بنت فلان انزين شلون عرفونا ؟؟؟؟ لان من كثر الحضور والملائكه تنادي بعضها يقولون تعالوا فلانه وفلانه قاعدين يذكرون الله ليما يوصلون لله سبحانه فا نكون معروفين بالسماوات العليا

وبيوم القيامه المسلم اما انه يروح الجنه على طول او اذا كان مسلم نطق الشهاده وعنده معاصي يعذب في النار الى ان ينقى من المعاصي وبعدين يروح الجنه فا تخيلوا شخص حضر حلقه وحده حتى لو ما كان ناوي يحضرها وربي اختاره لانه يحبه وحضرها وكانت عنده معاصي ما تاب عليها ومات وهو عليها اكيد راح يعاقب عليها في النار واللي ربي غفر لهم من نفس هذي الحلقه اللي كان فيها راحوا الجنه ولمن يشوفونه انه راح يرمى في النار يقولون ياربي هذا كان معانا مره في الحلقه ويترجون الله سبحانه الى ان يغفر له


نسأل الله اننا نكون من المعتوقين من النااااااااار وتكون قبورنا روضه من رياض الجنه ويغفر لنا ما تقدم من ذنبا وما تاخر


اسفه شكلي طولتها عليكم وايد بالكلام وهدفي من هذا الكلام كله اننا نسوي مثل حلقات الذكر بهالصفحه وترى هو شي بسييييييط جدا بمجرد اننا ننصح بعض او نذكر قصص شفناها او سمعنا فيها من مصادر موثوقه او نتكلم عن شغلات تفيدنا بالدنيا والاخره منها راح نستفيد ومنها راح نتوعى عن شغلات يمكن نعرفها ونسيناها ومنها يمكن تكون سبب في سعادتنا بالدنيا وتغيير من مجرى حياتنا وشخصياتنا وهالشي شفته بعيني وبعدين بتكلم بالموضوع هذا لان ودي برايكم بالموضوع وودي اترك لكم المجال واسال الله ان يعطينا وياكم العمر عشان نكمل سواااااااااااااااالفنا

عالية همه

جزاج الله خير ياسنو روز على هالموضوع وجزاكم الله خير اخواتي في الله على هالتشجيع اللي فعلا يحفز للعطاء اكثر واكثر والاستمرار في الدعوه لله اذا وجد المعين بعد الله وهو القبول بين الناس لما نتحدث وندعو له فبارك الله في سعيكم للخير وثبتكم على الحق ورزقكم علما نافعا ورزقا طيبا وعملا متقبلا ......


حلقات الذكر بداية هي وصية من رسول الله وسنة والسنن يجب اتباعها ولا وين حبنا لرسولنا اذا مااتبعنا ماامرنا عنه وطاعة الله من طاعة رسوله قال الرسول صلى الله عليه وسلم ((إذا مررتم برياض الجنة فارتعوا ، قالوا : وما رياض الجنة ؟ قال : حلق الذكر )) ...... للترمذي

ومانغفل عن فضل حلقات الذكر وجزاها الله خير غاليتي سنو روز ذكرة الكثير منها بتحدث عنها انا بشكل موجز مسند بأحاديث :

1- تعتقدون فيه فضل اكبر من هذا سبحان الله مغفره من الذنوب وربما رحمة الله تدخلك الجنه بمجرد حضورك دون حاجه بس مرافقه لشخص كيف لو كنتي انتي بنفسج سعيتي لهالدرس واجتهدتي بنشر اعلان عنه وعلمتي رفيجتج واختج وبنات عمج وكل اللي تعرفينهم عن هالدرس اكيد وبلا شك راح تاخذين اجر كل من عطيتيه خبر بالدرس والدال على الخير كفاعله ........

2- من حضر حلقة ذكر تغشاها رحمة الله وتحفها الملائكه وذكر الله فيها تدرين شنو فضلج جاء في الحديث القدسي: { من ذكرني في نفسه ذكرته في نفسي، ومن ذكرني في ملأ ذكرته في ملأ خير منهم } ......

3- شغله ممكن كثييييييير تصادفه وتصير وياه الا من رحمه الله الا وهي ان اغلبنا نحضر الدروس ونتأثر بما يدور فيها ونعقد العزم على تطبيق ماقيل فيها لكن اذا رحنا البيت وكان ماصار شيء لاحضرنا ذكر ولا كان اليوم هذا انحسب علينا اصلا وهالحديث الي بذكره يبين هالصنف وهو ان احد الصحابه سأل الرسول فقال { يا رسول الله! نكون عندك تذكرنا بالنار والجنة كأنه رأي عين فإذا رجعنا عافسنا الأزواج والضيعة ونسينا كثيرا قال فقال رسول الله صلى الله عليه وسلم: لو كنتم كما أنتم عندي لصافحتكم الملائكة في الطرقات }..... شالفايده اختي تقعدين وتسمعين ويمكن تبجين من بعض المواقف والقصص وايات قرآنيه وتعزمين انج بتتغيرين كليا وانج عرفتي الصح وان حياتج كانت ولا شيء وانها بتعيشين حياة ثانيه بعد هاليوم لكن فجاه بعد هالدرس وبعد ماتطلعين وتوصلين بيتكم سيده بطلتي التلفزيون وطالعتي هالفلم البايخ اللي مليان لقطات الله عالم فيها وقلبتي القنوات ولا فيديو كليب وعليتي على الاغنيه وقعدتي اترقصين يااااااااااااااه وين الدمعه اللي مساع وين خلاص بتوب وبتغير كلش راح ...........

4- ذكر الله يطمئن القلب ويهدي النفس ويسكن الروح قال الله تعالى (( الا بذكر الله تطمئن القلوب )) ......


ادري طولة بالحجي واختم كلامي بأن اسأل الله ان يجعلنا من المفردون الذين قال فيهم الرسول صلى لاله عليه وسلم (( سبق المفردون قالوا وما المفردون قال الذاكرون الله كثيرا والذاكرات )) اسأل الله ان تحفنا الملائكه ويذكرنا الله في الملأ الاعلى وان يقال لنا قوموا مغفروا لكم قد بدلت سيئاتكم حسنات وان يعيننا الله على ذكره وشكره وحسن عبادته وان نحشر على منابر من نور انه الولي والقادر على كل شيء ...........


لي عوده ان شاء الله وعسى الله يبارك بهالموضوع ويجعله في ميزان اعمالنا ومن سعى له وينفع به امين يارب العالمين .......

محبة الصالحين

السلام عليكم ..

الله يجزيكم خير يارب ..

اخواتي .

تبون تبدؤن بشيء معين ؟؟

اشياء كثيرة في بالي من زمان ودي اتناقش فيها .. وهاالموضوع هو انسب موضوع لها بحول الله ..

ياريت بعد تحطون ضمن هدف هالموضوع الظواهر اللي نشوفها بنفوسنا واشلون نقدر نحلها

اقصد مجتمعنا حنا البنات ...

؟!؟!؟!؟!؟